Die lewe en wêreld van Thys Wilkinson, BC (Before Christ)
Net kortliks hoe my lewe verloop het tot 30/4/08.
Vriende, drank en rugby het my lewe oorheers tussen 18 en 38. Tussen deur moes ek darem vrou ook vat en was ek vir 'n kort periode verloof aan iemand wat net so hard gekuier het soos ek. 'n Vrou so na my hart. Dit was nooit haar skuld dat ek so gekuier het nie.... dis my keuse maar dit het daartoe gelei dat ons uitmekaar is in 1995.
Nou was die honde eers los! Robbie Wessels sing "Hou vas jou matras, want De Vos is weer los".... kyk nou is Thys heeltemal los sonder enige matras.
Dieselfde jaar ontmoet ek vir Madalene (my vrou) deur ander vriende. Die res is geskiedenis... Ons is in 1997 getroud en in 2000 is Matthys Jnr gebore. Verantwoordelikheid? Wat is dit!!?? Thys lewe nog steeds dieselfde lewe asof hy 20 jaar oud is. Daar was tye wat sy wou loop, maar iets het haar terug gehou...(seker my lang hare). Ken jy vir “man sy sal weer oor dit kom"? Daar was nooit geld vir die regte dinge nie, maar vir Lawaaiwater altyd!
Laat nagte uit saam met die manne en 'n vrou wat alleen haar seun moes groot maak het maar sy pad verder gestap. Kerk! Ja, ek moes seker my gesig gaan wys... dis die regte ding om te doen.... Gelukkig het God ander planne gehad met hierdie swaap. Op 30/4/08 word ek wakker met 'n duidelike boodskap van God "Kry jou lewe reg".
Ek en Madalene het hieroor gepraat en ons het saam besluit ek moet die dominee gaan sien. My oorlede skoonpa het baie van Leopold gepraat so kom ek ”try” hom ook (is ook maar met min tevrede).......Ons 1ste afspraak was 'n riller wat Mr Video nie het nie. Die ou bid vir my in Smiling Oven voor 'n klomp mense!!!!!!! is hy mal!!!!!??
Twee dae later beland ek by my hart se punt, Jacques de Klerk. Dieselfde week doen ons 'n oorgawe en my lewe begin verander met God se genade. Finansies was op daardie stadium 'n groot probleem in ons lewens en ek en my vrou moes bly glo en vertrou dat God sal sorg, hou net aan volhard.
As die man in die huis moes ek een aand my trots sluk toe ons selgroep 'n klomp kruideniersware vir ons bring, so sleg het dit gegaan. Ek moes leer om nederig te wees en om nie God se liefde weg te stoot as hy dit deur ander mense vir ons gee nie. Vir 'n man soos ek was dit moeilik om deur dit te kom...... "wat gaan die mense sê " eerder as om te se kyk wat doen God!!!!!!!!!!!!
Januarie 2009 gee God vir my ander werk vir amper dubbel die salaris wat ek toe verdien het. Ek het ook geleer om te huil want nou leer ek te veel van God se genade vir 'n sondaar soos ek! Die pad tot vandag was nie altyd maklik nie en daar was tye wat ek gevra het wat help dit tog om te bly glo as die vyand my bly verniel elke dag. Dinge by die werk is toe nie so rooskleurig soos die salaris nie.........Nog steeds het God ander planne!
Al wat ek moes doen was om 'n voorbeeld te stel en ‘n lewe te lei wat getuig van dit wat ek glo. Een oggend vra die werkers my of ek nie die dag met skriflesing en gebed sal begin nie!!!! Ons doen dit vandag nog!!! Elkeen van hulle het 'n dagstukkie boekie by my kom neem toe ek dit vir hulle aanbied.
Is God nou klaar met my, ek doen mos nou wat Hy gevra het.......Nee ou Thysie jy begin nou eers.......!
Ek en my groot vriend (letterlik en figuurlik), Basil, is saam deur dieselfde seisoen vir 'n rede en ons het bymekaar uitgekom a.g.v. 'n manne kamp wat Lourensrivier aangebied het (dankie Here daarvoor anders sou ons seker nooit mekaar leer ken het nie). God het 'n plan met ons twee saam net soos wat ons is. Hy wil nie hê ons moet iemand anders wees nie, net Thys en Basil. Gaan en maak mense My dissipels!!!!!!!!!!
Wat 'n wonderlike voorreg om vir God te kan werk. Vergeet van die swaar kry, "enjoy the ride".
Aan elke man: Waardeer jou vrou, jy verdien haar nie, God het haar vir jou gegee! Myne was vir 11 jaar geduldig met my..... ook net omdat sy een van God se menslike engele is en omdat sy gehoorsaam was aan Hom.
Alle eer aan ons Skepper dat Hy my gered het en dat ek vandag kan begin teruggee. Dankie aan elke persoon by Lourensrivier wat 'n aandeel gehad het in my wedergeboorte.
Amen!
Thys Wilkinson