Advent en Kersfees
Ons nader nou weer die begin van die kerkjaar – dis die tyd van Advent en Kersfees. Advent beteken “koms van ‘n hooggeplaaste persoon”.
02 Desember 2018 is die eerste Sondag van Advent en 23 Desember 2018 die vierde en laaste Sondag van Advent waarop Kersfees volg.
In hierdie tyd staan die woorde "wag" en "waak" sentraal. Dit is ‘n tyd van besinning, voorbereiding en vreugde oor die geboorte van ons Verlosser. Die kleur in hierdie tyd is purper, asook koningsblou. Kersdag en Sondag na kersfees se kleure is wit en goud.
In die gemeente gebruik ons ‘n adventkrans met vyf kerse. Die sirkel van die adventkrans herinner ons aan God wat ewig is en Sy genade vir ons wat geen begin of einde het nie. Die groen van die krans wys op die hoop van vernuwing en ewige lewe wat ons in God het. Kerse simboliseer die koms van die God se lig na die wêreld deur die geboorte van sy Seun, Jesus Christus.
Elke Sondag word daar ‘n kers aangesteek. Hoop (purper kers), Vrede (blou kers), Vreugde (ligroos kers) en Liefde (purper kers).
Op Kersdag word ‘n langer wit kers, die Christuskers aangesteek.
- Trefslae: 978
